Question

उताऱ्याच्या आधारे सूचनेनुसार कृती करा.

१) योग्य पर्याय निवडून विधान पूर्ण करा.  (२)

• मधमाशा किती कष्ट करून मध गोळा करतात हे मुलांनी पाहिले तर .....

1. मुले मध गोळा करायला शिकतील.
2. मधमाशा मध कशा गोळा करतात हे समजेल.
3. मुलांना कष्टांची किंमत आणि गंमतपण कळेल.
4. मधमाशा दररोज किती मध गोळा करतात हे समजेल.

• मुंबईतील नळ दुरुस्त करणाऱ्या व्यक्तीच्या कामाचा परिणाम.....

1. काही वर्षांत लाखो लीटर पाणी वाचले.
2. सगळेजण नळ दुरुस्त करायला शिकले.
3. सगळ्यांच्या डोळ्यांतून पाणी आले.
4. आता मुंबईत एकही नळ नादुरुस्त नाही.

मी तुम्हांला फुलपाखरांच्या मागे पळताना पाहिलंय. तुमच्यापैकी एखाद्याने तरी फुलपाखरांच्या सुंदर आयुष्याचा अभ्यास केला पाहिजे. तुमच्या वर्गाच्या बाहेर मधमाश्यांचं मोहोळ होतं म्हणून खूप दिवस खिडकी बंद होती; पण आता खिडकी उघडा. त्या मधमाश्या नीट बघा. त्या जसं पोळं बनवतात ना तसं परफेक्ट घरसुद्धा बनवू शकत नाही आपण. त्या किती कष्ट करून मध गोळा करतात हे बघितलं तरी तुम्हांला कष्टाची किंमत आणि गंमतपण कळेल. मुंबईत एक माणूस असा आहे जो दर आठवड्याला लोकांच्या घरी जातो. ओळख नसली तरी आणि करतो काय तर फक्त लोकांच्या घरी बेसिनचा, बाथरूमचा नळ गळत तर नाही ना हे तपासतो. त्याच्या एकट्याच्या कामामुळे गेल्या काही वर्षांत लाखो लीटर पाणी वाचलंय, जे नळ खराब असल्यामुळे वाया जायचं. पाण्याचे वाया जाणारे थेंब वाचवणं हे दु:खी माणसाच्या डोळ्यांतलं पाणी पुसण्याएवढंच महत्त्वाचं काम आहे. एका मुलाने आपल्या वाढदिवसाचे पैसे वाचवून ठेवले आणि काय केलं माहितेय? झोपडपट्टीमधल्या मुलांना नाल्यावरून एका तुटक्या लाकडी पुलावरून जावं लागायचं. त्याने आपल्या वाढदिवसाच्या पैशांतून त्या मुलांसाठी पक्का पूल बनवण्यासाठी आपले पैसे दिले.

२) पुढील कृतीतून दिसून येणारा गुण ओळखा.  (२)

अ) वाढदिवसाचे पैसे नाल्यावरील पूल बांधण्यासाठी दिले......

ब) काय ते लिहा.

पाण्याचा वाया जाणारा थेंब वाचवणे म्हणजे ...........

३) स्वमत-   (३)

'पाण्याचे वाया जाणारे थेंब वाचवणं हे दु:खी माणसाच्या डोळ्यांतलं पाणी पुसण्याएवढंच महत्त्वाचं काम आहे', आप्पांच्या या विधानामागील अर्थ स्वत:च्या शब्दांत लिहा.

Answer 1

१)

• मधमाशा किती कष्ट करून मध गोळा करतात हे मुलांनी पाहिले तर मुलांना कष्टांची किंमत आणि गंमतपण कळेल.
• मुंबईतील नळ दुरुस्त करणाऱ्या व्यक्तीच्या कामाचा परिणाम काही वर्षांत लाखो लीटर पाणी वाचले.

२) 

अ) वाढदिवसाचे पैसे नाल्यावरील पूल बांधण्यासाठी दिले- समाजसेवा, पैशांचा सदुपयोग.

ब) पाण्याचा वाया जाणारा थेंब वाचवणे म्हणजे दु:खी माणसाच्या डोळ्यांतलं पाणी पुसणे.

३) पाणी हे बहुमोल आहे. पाणी हेच जीवन आहे. आपल्याला हे ठाऊक आहे; पण तरीही कळतनकळत आपण पाणी वाया घालवतो. एकीकडे पाण्याचा बेसुमार वापर होताना दिसतो, तर दुसरीकडे हंडाभर पाण्यासाठी उन्हातान्हांतील मैलोन्मैलांची वणवण असे विरोधाभास दर्शवणारे चित्र आहे. केवळ अज्ञानामुळे अनेक घरांतील गळक्या नळांमधून लाखो लिटर पाणी वाया जात असते. ही गोष्ट ओळखून मुंबईतला एक माणूस घरोघरी जाऊन ते गळणारे नळ तपासतो व दुरुस्त करतो. यामुळे, काही वर्षांतच वाया जाणारे लाखो लिटर पाणी वाचले आहे. त्यामुळे, पाण्यासाठी धडपडणाऱ्या कुणाला पाणी मिळाले आहे. त्यांचे दु:ख दूर झाले आहे. त्याचे हे कार्य कुणा दु:खी माणसाचे अश्रू पुसण्याइतकेच महत्त्वाचे आहे असे आप्पांना वाटते.