Question

खालील निवेदन वाचून बातमी तयार करा:

अभिनव विद्यालय, नागपूर ‘भव्य विज्ञान प्रदर्शन’ संपन्न. दि. 15 ऑक्टोबर ते 18 ऑक्टोबर वेळ स. 11 ते सं. 5 वाजेपर्यंत अध्यक्ष - श्री. सुहास माने प्रमुख पाहुणे - श्री. आशिष वाघ एकूण 50 शाळांचा सहभाग उद्घाटन सोहळा संपन्न उत्कृष्ट प्रकल्पांना पारितोषिके विज्ञान नाटिका सादर

Answer 1

दैनिक लोकपत्र

अभिनव विद्यालय, नागपूर ‘भव्य विज्ञान प्रदर्शन’ संपन्न. दि. 24 ऑक्टोबर 2015 आमच्या वार्ताहराकडून, नागपूर नागपूरच्या अभिनव विद्यालयात 15 ऑक्टोबर हा जागतिक विद्यार्थी दिन साजरा करण्याचे औचित्य साधून 15 ते 18 ऑक्टोबर या चार दिवसांत विज्ञान प्रदर्शन आयोजित करण्यात आले होते. प्रदर्शनाचे उद्घाटन येथील शास्त्र महाविद्यालयातील भौतिकशास्त्र विभागाचे प्रमुख आणि प्रमुख पाहुणे श्री. आशिष वाघ यांच्या हस्ते झाले, तर शारदा विद्यालयाचे मुख्याध्यापक श्री. सुहास माने अध्यक्ष म्हणून उपस्थित होते. या प्रदर्शनात अनेक वैज्ञानिक प्रयोग, विज्ञानविषयक साहित्य आणि तक्ते सादर करण्यात आले होते. 50 शाळांनी यात सहभाग घेतला होता. विद्यार्थ्यांनी सौरऊर्जा, प्रकाश, बी-बियाणे आणि मानवाचे आरोग्य यांसारख्या विषयांवर शिक्षकांच्या मार्गदर्शनाखाली तयार केलेले प्रकल्प प्रदर्शनासाठी ठेवले होते. सकाळी 11 ते सायंकाळी 5 या वेळेत प्रदर्शन पाहण्यासाठी पालक, शिक्षक आणि विद्यार्थी मोठ्या प्रमाणावर उपस्थित होते. विशेष प्रकल्पांमध्ये एका विद्यार्थ्याने शेतात बी पेरणीसाठी उपयुक्त बहुउद्देशीय सायकल तयार केली होती, ज्याचे उत्कृष्ट वर्णन त्या विद्यार्थ्याने केले. प्रा. सुरेश देशमुख आणि डॉ. विलास राणे यांनी प्रकल्पांचे परीक्षण करून उत्कृष्ट प्रकल्पांची निवड केली. 18 ऑक्टोबर रोजी सायंकाळी 5 वाजता पारितोषिक वितरणाचा कार्यक्रम पार पडला. कार्यक्रमाची सुरुवात ईशस्तवनाने झाली आणि त्यानंतर विज्ञान विषयाचे श्री. जयेश जोशी यांनी लिहिलेली व दिग्दर्शित केलेली "मज विज्ञानाचे पंख हवे" ही नाटिका सादर करण्यात आली. अध्यक्ष श्री. सुहास माने यांनी सर्व सहभागी विद्यार्थ्यांचे कौतुक केले, तर प्रमुख पाहुणे श्री. आशिष वाघ यांनी अंधश्रद्धा निर्मूलन आणि विज्ञानाचा उपयोग देशाच्या प्रगतीसाठी करण्याचे आवाहन आपल्या भाषणातून केले.